Sista pa’m, ou byen ak Jezi

Lè zanmi m te rele m pou ban m nouvèl la, pa t gen anyen ki te ka prepare m pou yon chòk konsa. Menm lè mwen te konnen Michelle pa t an sante, lanmò li se te dènye bagay ki te ka travèse lespri m. Se tankou yon pati nan mwen te refize kwè ke yon limyè konsa te ka etenn.

Michelle… se pa t sèlman yon zanmi. Se te youn nan rasin nan lavi m, yon moso nan anfans mwen. Menm lè distans te mete kilomèt ant nou, teknoloji te kenbe kè nou kole. Nou te toujou jwenn yon fason pou nou ri ansanm, pou nou pale, pou nou sipòte youn lòt.

Li te yon bon moun, yon fanm Bondye, yon manman ekstraòdinè, yon sè, yon pitit. Yon nanm ki te bèl ni anndan ni deyò. Michelle te gen yon jan pou l ranpli nenpòt espas ak lavi ak lanmou. Men, pi plis toujou, li te yon manman fyè—jan li te konn pale de pitit fi li ak pitit gason li, ou te ka wè klète nan je li, yon fyète ki pa t ka kache.

Te gen yon epòk kote pa t gen yon sèl jou ki te pase san nou pa pale. San nou pa fè blag. San nou pa leve moral youn lòt. Men lavi, jan li ye a, pran nou nan wout diferan. Espesyalman pou anpil nan zanmi m ki Ayiti, kote ensekirite, lavi chè, ak separasyon ak fanmi vin tounen yon chay chak jou… Men Michelle, li menm, li te toujou rete pozitif. Li te toujou kenbe elegans li, fòs li, lafwa li.

Epi te gen fraz sa a li te toujou repete:“Mwen byen ak Jezi, sista.”

Kèlkeswa sa ki t ap pase—Tire nan lari… “Mwen byen ak Jezi.”Pwoblèm lakay… “Mwen byen ak Jezi.”Maladi nan kò… “Mwen byen ak Jezi.”

Mwen pa kache sa… mwen te konn kestyonnen pawòl sa a anpil.Èske se te yon fason pou li kache doulè li?Oswa èske se te yon lafwa ki tèlman solid, li pa t bezwen esplike anyen ankò?

Men, lè mwen te wè vizaj ou pou dènye fwa… nan sèkèy la… tout kestyon m yo te jwenn repons yo.

Te gen yon lapè sou figi ou.Yon trankilite mwen pa ka esplike.Yon silans ki t ap pale pi fò pase tout pawòl.

Epi se la mwen te konprann…

Sista pa’m, ou pa sèlman byen ak Jezi…ou byen nan bra Jezi.

Ou kite dèyè doulè, laperèz, batay.Ou antre nan repo etènèl, kote pa gen kriye ankò, pa gen soufrans ankò.

Memwa ou ap viv nan nou.Nan ri nou.Nan priyè nou.Nan lanmou ou te simen nan kè nou.

E yon jou… nou va rankontre ankò.

Repoze anpè, Michelle.